Maridable muerto na accidente

Muerto na acto el man maridable despues ya hace canila bangga el van na highway del Manicahan enantes serca man medio dia.
El man maridable amo canda Randy y Jenalyn Jalon, ambos de Latuan.
Muntao sila na motorsiclo ta maneha si Randy y encamino sila para na Sitio Catumbal, Cabaluay para atende el entiero del dila pariente cuamdo ya ocuri el accidente.
Asegun mienttas ta biaha el maridable yan encuentro canila el un privado van ta maneha si Kent Patrick Lumacad hunto consu companiero ta biaha para na Zamboanga del Sur y ya hace banga con el motorsiclo.
Ta aparese ya come el camino del mam maridable el van y ya resulta na accidente.
Porcausa con el fuersa del bangga ya bula lehos el man maridable y ya muri na acto.
El tsuper del van yan surrender na pulis despues del incidente.