General Santos City— Gipa-ilalom sa lock down sa 10th Infantry Division ang Gensan ug Davao area human ang natigayong pagbusikad sa Isulan, Sultan Kudarat.
Sumala kang 10th ID Commanding Officer Major General Noel Clement nga tumong sa maong lockdown ang masigurong dili mahitabo sa area sa 10th ID ang nahitabo sa Isulan.
Sa karon matud pa, nagdugang na sila ug deploy sa tropa sa tanang mga entrance ug exit point sa Davao ug Gensan ingon man EOD team ug k-9 unit aron sa pagsuta kung adunay mga posibleng mga bomb componenets nga isulod.
Dugang pamahayag ni Major General Clement nga sa kasamtangan aduna na silay suspek nga ginatutukan human ang maong insidente apan nagdumili una kini sa pagbutyag gumikan sa nagpadyaon pa nga imbestigasyon.
Gibutyag man usab niini nga mas taas ug mas hugot nga siguridad ang ilahang gipatuman sa Gensan ug Davao gumikan ilalom sa area of responsibility sa 10 th ID ini mga syudad ang adunay taas nga potensyal nga mahimong target sa teroristang grupo.
Apan gipaklaro niii nga dili pasabot sa gipatuman ug lock down sa Gensan ug Davao, dili na mamahimong musulod ug mugawas sa maong mga lugar.
Pasabot lang matud pa niini nga ilahang ginasiguro nga walay makasulod nga mga tawo nga naga-plano ug dautan sa ilahang area of responsibility.
