Nagalab-ot sa masobra 101,400 ka mga kabataan edad 6 tubtob 59 ka bulan ang target sang Provincial Health Office sang South Cotabato nga mapaidalom sa measles immunization sa pag-arangkada subong nga adlaw sang Ligtas Tigdas door to door Supplemental Immunization Activity sang Department of Health nga magadugay naman tubtob Hunyo 8 subong nga tuig.
Katuyuan sang nasambit nga programa nga mapunggan ang pagdamo sang balatian nga tipdas matapos nga gindeklarar ang bug-os nga Mindanao nga may outbreak sang nasambit nga balatian.
Samtang ginpaklaro ni Maam Luding Larong, Provincial Immunization Program Coordinator sa South Cotabato nga libre ang nasambit nga bakuna kag bisan nga nabakunahan na sang syam ka bulan ang bata ang sarang sa gihapon makapaidalom measles immunization.
Bawal naman nga bakunahan ang bata kon may ginabatyag sa lawas kapareho na lamang kon ginaubo kag ginalagnat kundi balikan na lang sang health workers.
Apang kon nabakunahan na ang bata normal lamang suno pa nga makabatyag ini sang sakit sa ginbakunahan nga parte sang lawas kag lagnaton.
May-angot sini, ginaawhag sang pamunuan sang Provincial Health Office sang South Cotabato ang mga ginikanan nga pabakunahan gid ang mga kabataan batok tipdas.
