Yara na sa 122,781 doses sang COVID-19 ang nabakuna sa mga target groups sa South Cotabato base sa datos sang Integrated Provincial Health Office.
Ginpahayag ni Genesis Navales, National Immunization Program provincial coordinator, sa ginpatigayon nga Local Vaccination Operation Center (LVOC) meeting nga sa subong yara na sa 60,758 ka mga indibidwal ukon 6.10 percent sang 2020 population sang South Cotabato ang fully vaccinated na,
Yara naman sa 62,023 ang nabakunahan na sang first dose sang COVID-19 vaccine.
Nahibaluan nga sang 2020 yara sa 996,843 ang populasyon sang South Cotabato.
Sa datos sang IPHO, 14,671 ka mga frontline healthcare workers (A1), 21,173 ka mga senior citizens (A2), kag 26,809 persons with co-morbidities (A3) ang fully vaccinated na.
Suno kay Navales nagalab-ot sa 98 percent sang gin-alokar nga bakuna sa South Cotabato ang nabakuna na .
Nagalab-ot sa 125,673 doses sang Sinovac, AstraZeneca kag Janssen vaccines ang napadala na sang DOH sa probinsya.
Subong nga semana nakabaton ang South Cotabato sang dugang nga 7,444 doses sang bakuna nga ginalakipan sang 6,700 doses sang Sinovac nga para sa first dose sang A1 to A3 priority groups subong man 744 doses sag AstraZeneca para sa mga miyembro sang Philippine National Police.
Ginpaklaro naman ni Arjohn Gangoso, health education and promotion officer II sang DOH 12 nga ang mabilin nga AstraZeneca doses sang mga police personnel ang ihatag sa mga indibidwal nga yara sa A1 to A3 groups.
