Nagalab-ot sa 149, 284 ka mga kabataan sa South Cotabato ang target sang Integrated Provincial Health Office nga mabakunahan kontra tipdas kag rubella dire sa probinsya sang South Cotabato sa Oktubre 26 tubtob Nobyembre 25, 2020.
Suno kay Genesis Navales, Vaccination Program Coordinator sang Integrated Provincial Health Office target sang ‘CHIKITING LIGTAS sa dagdag bakuna kontra rubella at tigdas’ ang mga kabataan edad syam ka bulan tubtob lima ka tuig panubo.
Pahayag pa ni Navales nga ang nasambit nga tikang ang agud nga malikawan nga may matabo nga outbreak sang tipdas sa masunod nga tuig, matapos nga nagasaka ang kaso sang nasambit nga balatian sa subong sa pungsod.
May-angot sini, target sang IPHO ang 95 porsyento ukon 141,820 sang bug-os nga populasyon sang mga kabataan nga 149, 284 nga mabakunahan subong measles vaccination.
Ginhatagan punto ni Navales nga wala sang bulong ang tipdas kag bakuna lang gid ang makabulig nga malikawan nga lakip sa sintomas ang lagnat, rashes nga nagaumpisa sa guya, ubo, nagapula ang mata kag sip-on.
Samtang sa subong may kaso sang tipdas sa South Cotabato, apang nagaedad ini sang 5-anyos pataas kag wala sang narekord nga patay subong nga tuig.
Ginsiguro niya man nga wala sang dapat kabalak-an ang mga ginikanan sa bakuna kontra tipdas tungod madugay na ini nga ginagamit.
Ginaawhag niya man ang mga ginikanan nga dal-on sa mga designated areas sa mga barangay ang mga kabataan para sa measles vaccination.
