Bisan nga wala nalakip ang South Cotabato sa ulihi nga climate advisory sang Pagasa angot sa dry spell may narekord na nga danyos sa mga pananom sa pipila ka lugar sa probinsya partikular na sa banwa sang Surallah tungod sa mainit nga panahon.
Base sa datos nga ginsubmitir sa ila suno kay Provincial Disaster Risk Reduction and Management Action Officer Mila Rivera yara sa 195 ka ektarya sa mais kag 226 ka mga mangunguma ang apektado kag sa palay yara sa 6.2 ka ektarya kag 17 ka mga mangunguma ang apektado.
Sa subong wala pa man sang nagdeklarar sang state of calamity sa epekto sang mainit nga panahon tungod may criteria man nga dapat sundon.
May-angot sini, suno kay Maam Rivera nagapatigayon sa subong sang rapid damage anaylsis assessment ang PDRRMO sa mga apektado nga area matapos nga sa banwa sang Tampakan may mga lugar man nga nakaeksperyensya sang kakulangan sang tubig agud nga maka-extend sang ayuda ang lokal nga panggobyerno.
Ginapaassess man sini ang iban nga area kon bala may natuga na nga danyos partikular na sa mga pananom ang naeksperyensyahan nga mainit nga panahon.
Ginpahayag man ni PDRRM Action Officer Rivera nga nagapadayon man ang IEC sang Provincial Agriculture Office nga indi magtanom kag sa bahin sang Provincial Veterinary Office manghatag man sila sang vitamins para sa mga kasapatan.
