*BACOLOD CITY* – Nagdangat sa kapin 330 ka mga tawo ang nagkaladakpan sa
una nga adlaw sa pagpatuman sang Anti-Jay Walking Ordinance sa Bacolod City.
Ginpahayag ni Bacolod Traffic Authority Office – BTAO Head P/Supt. Luisito
Acebuche nga 14 sa mga nadakpan ang nagpaidalum sa community service bangud
wala sila sang kwarta nga ibayad sa penalty ukon multa.
Suno pa kay Acebuche nga kalabanan sa mga nagcommunity service ang indi
taga-Bacolod kundi naghalin sa iban nga lugar sa Negros.
Apang, ginpahayag sang BTAO head nga bisan pa ihambal sang mga nadakpan nga
wala sila nakahibalo angut sa Anti-Jay Walking wala sang exemption kon ini
sila ang wala nagsunod sa amo nga ordinansa.
Naobserbahan sang BTAO nga bisan may higot na gid nga ginabutang, padayon
pa gihapon nga nagalapas ang iban, kulang nalang lakaran pati ang baral.
Sa padayon nga pagpatuman sini, nagapati si Acebuche nga mangin alagyan ini
sa mas disiplinado nga pomoloyo kag mga bisita sa ulihi.
Nagapangayo man sang suporta si Acebuche nga updan ini sang publiko.*/dyHB
BACOLOD*
