Ginalauman nga magataas ang take home pay sang masobra sa pito ka milyon nga mga trabahador nga nagabayad sang buhis sa tion nga mapatuman ang Tax Reform for Acceleration and Inclusion (TRAIN) nga ginaduso sang Duterte administration.
Sa report sang senate committee on ways and means nga ginapamunuan ni Senador Sonny Angara, indi na pagbuhisan ang una nga 150 mil pesos nga tuigan nga taxable income kag magapabilin nga tax-free naman ang 13th month pay kag iban pa nga bonus.
Ang isa ka empleyado nga may may apat ka dependents ang makaangkon sang additional exemption sang tubtub 100,000 pesos.
Base man sa version sang senado, ang mga marginal income earners nga lunsay self-employed nga ang kita mas manubo sa 100,000 pesos ang wala man sang pagabayaran nga buhis.
Kalakip sa mga ini ang mga mangunguma, mangingisda, mga nagapanag-iya sang magagmay nga sari-sari store, magamay nga karinderya, subong man ang divers kag operators sang tag-isa ka tricycle.
