Nagalab-ot sa masobra P11 million ang gin-alokar nga pondo sang provincial government kag Division of South Cotabato para sa patigayunon nga Socsargen Regional Athletic Association (SRAA) meet sa masunod nga bulan.
Sa nasambit nga pondo suno kay Schools Division Supt. Ruth Estacio ang P5.7 million ang magakadto para sa 25 days intensive training sang mga athletes sang South Cotabato nga nag-umpisa na sang Sabado nga adlaw, samtang P5.3 million naman ang gin-alokar para sa SRAA proper.
Nagalab-ot naman sa P2.1 million ang gin-alokar para sa insentibo sa diin ang gold ang makabaton sang P5, 000.00, silver 3,000.00 kag ang bronze makabaton ang athlete sang P2, 000.00
Subong nga 2020 SRAA meet suno kay SDS Estacio target nila nga mangin champion ukon mabawi sa General Santos City ang korona.
May-angot sini, iya ginapasalamatan ang provincial government sang South Cotabato sa suporta para subong nga tuig nga SRAA meet.
