Nagapadayon ang paghatag sang bulig sang Department of Labor and Employment ukon DOLE 12 sa mga apektado sang pandemya nga mga trabahante nga yara sa informal sector sa rehiyon dose.
Ini matapos nga ginpangunahan ni DOLE 12 Regional Director Raymundo Agravante kag Assistant RD Arlene Bisnon ang pagturn-over sang P3,188,773.00 para sa 303 ka mga empleyado nga yara sa informal sector sa mga banwa sang Banga kag Tantangan sa South Cotabato kag Columbio sa Sultan Kudarat.
Mismo ginbaton ni Columbio Mayor Edwin Bermudez ang tseke nga nagakantidad sang P1, 942,710.50 para sa 113 ka benepisyaryo, sa banwa sang Tantangan ginbaton naman ni Vice Mayor Timee Joy Gonzales ang pondo para sa Barangay Dumadalig nga nagakantidad sang P643, 653.00 nga yara sa 50 ang benepisyaryo kag P602,410.00 para sa 40 ka mga benepisyaryo sa banwa sang Banga nga ginbaton ni PESO Manager Joseph Franco bilang representante ni Mayor Albert Palencia.
Ang nasambit nga ayuda ang sa idalom sang DOLE Integrated Livelihood Program sang ahensya nga gamiton sang municipal ka barangay government bilang Accredited Co-Partner (ACP) sa pagbakal sang “livelihood starter kits” agud buligan ang nasambit nga mga benepisyaryo nga makaumpisa sang magamay nga negosyo.
Samtang para sa mga indibidwal ukon grupo nga luyag mabuligan sang DOLE sa kabuhayan projects, magpadulong lamang suno pa ukon makig-angot sa Public Employment Service Office (PESO) sa munisipyo ukon syudad.
