Davao City – Gibutyag sa Department of Health (DOH)-XI nga ang panagtapok kun mass gatherings ang nag-unang rason nganong padayong mitaas ang kaso sa Coronavirus Disease 2019 (COVID-19) sa nagkalain-laing probinsya sa rehiyon.
Atol sa One Davao on COVID-19 Virtual Presser, gibutyag ni Dr. Raquel Montejo, DOH-XI Operations Chief, COVID-19 Vaccination Program, nga naobserbahan sa departamento ang pagtaas sa kaso sa COVID-19 sa milabay nga semana sa probinsya sa Davao del Norte, Davao de Oro ug Davao Oriental.
Gisaysay ni Dr. Montejo sa gihimong pagsusi nasayrang majority sa mga kaso nakuha sa mass gatherings labi na sa household sama sa pagpahigayon og birthday o ubang parties, haya ug uban pang panagtapok sulod sa panimalay diin dakong posibilidad nga nagkumpyansa ang mga tao nga dili magsuot og face mask, walay social distancing tungod kay paryente lamang ang kauban.
“We reviewed kadtong mga reported cases nila and we found out that majority of these cases.. kasagaran nganong naay (COVID-19) transmission in that areas is because nangahitabo nga gathering,” segun ni Montejo.
Dugang sa health official, nakuha usab ang COVID-19 sa clustering of cases sa hospital, pampubliko ug pribadong opisina ug uban pang gambalay.
Sa karon, nagkaubos na usab ang kaso sa COVID-19 sa maong mga probinsya. Gipahinumdom sa DOH-XI nga kanunay nga tumanon ang health and safety protocols batok COVID-19.
RadyoMaN Kirby Manzon
