Mataas sa subong ang transmisyon sang COVID-19 sa panimalay sa probinsya sang South Cotabato tungod sa masobra 2,145 nga kaso sang Abril 26 yara sa 623 ukon 29% ang halin sa balay, base sa datos sang Integrated Provincial Health Office.
Nagasunod ang halin sa mga pampubliko nga lugar kapareho sang merkado publiko kag ikatatlo ang sa workplace.
May-angot sini, ginarekomendar ni South Cotabato Provincial Health Officer Dr. Rogelio Aturdido Jr. ang pagpatuman sang minimum health standard sa balay.
Samtang sa aktibo naman nga kaso sang COVID-19 sa subong sa probinsya nakuha ang virus sa mga pampubliko nga lugar amo nga ginarekomendar ni Dr. Aturdido ang clustering sa barangay agud malimitahan ang hulag sang katawhan nga mamakal sang mga kinahanglanon.
Nagagwa man sa datos sang IPHO nga kadam-an sa naigo sang COVID-19 sa probinsya ang mga babaye kag yara sa working group nga nagaedad sang 21 tubtob 60 –anyos, nagasunod naman ang mga batan-on kag mga senior citizen.
Kadam-an naman sa napatay sa COVID-19 ang yara sa elderly group.
Padayon naman nga ginaapela ni Dr. Aturdido sa katawhan nga indi magkumpyansa batok COVID-19 kundi istrikto gid nga ipatuman ang minimum health standard tungod sa padayon nga pagsaka sang kaso sang COVID-19 sa probinsya.
