Davao City – Giingong ang 17 anyos nga biktima ang giselosan matud pa sa suspek sa pagpatay sa magsuon ug usa pa ka biktima sa Sunrise Village, Matina Crossing ning syudad bandang alas 5 kaganinang buntag, July 17, 2019.
Subay kini sa saysay sa caretaker sa boarding house nga si Michael Jardin atol sa pakighinabi sa DXDC RMN Davao subay sa pagdunggab-patay sa magsuon nga sila Jessa May Tecson Abitona, call center agent, 25 anyos, Jesybell Tecson Abitona, 20 anyos ug alyas James, 17 anyos, barkada sa magsuon kinsa parehong taga Manay, Davao Oriental samtang ang suspek mao ang live in partner sa biktimang si Jessa May nga si Daryl Pakna Aguilar, 22 anyos diin nasayran nga aduna silay duha ka mga anak apan maayo nalang nga wala sa incident area niadtong tungora.
“Murag maoy giselosan sa suspek,” segun ni Jardin.
Matud pa nga sa dihang way kapuy-an ang estudyante sa Davao, gipapuyo usa kini ni Jessa sa ilang boarding house.
Apan dugang sa caretaker nga aduna matud pay nakalabay nga panaglalis ang mag live-in ayha pa misangko sa usa ka madugoong krimen.
“Ingon sa boarders, upat ka adlaw ang milabay, miagi na og panaaglalis ug nadapatan matud pa ang asawa pero taod-taod nagkauli ra ang duha,” segun ni Jardin.
Gikanayon ni Jardin nga duha ka tuig pa lang nagpuyo sa boarding house ang mga biktima ug nakurat nalang sa nadawat nga balita sa maong insidente.
“Nasayran nako ang panghitabo katong nag chat na siya (suspek) sakong asawa nga manawag og pulis kay sumala niya napatay daw niya sila Jessa, sa dihang pagtuktok nako, giaksyon nako og tulak ang pultahan apan di maabrihan, kay sumala niya (Suspek nga si Daryl) nagbabag ang patayng lawas,” dugang ni Daryl.
Sa karon ginapahiluna pa ang patayng lawas sa biktima samtang ang suspek nagpaalim sa balay-tambalanan kinsa usab gikatakdang pasakahan na og kaso.
RadyoMaN Renz Barbarona
