Davao City – Gilaraw karon sa kasundaluhan nga himuong Maximum Security Zone ang Roxas Night Market.
Gibutyag ni Task Force Davao Commander Col. Consolito Yecla atol sa AFP PNP Presser nga kini subay sa pagkat-on ug pahinumdom sa nahitabong pagpamomba sa maong lugar kaniadtong tuig 2016 ingon man sagad mga turista ug Dabawenyo ginadayo kini.
Saysay ni Yecla, ang kalahian sa ipatumang seguridad mao ang pagkalambigit sa mga vendors, drivers ug establishment owners sa pagbantay aron magpabilin ang kahapsay ug kalinaw sa maong lugar.
Gani mas hugot na ang seguridad sama sa pagpatuman sa ‘no backpack policy’, ‘no jacket policy’ ug ‘no non-transparent water containers’ sama sa gipatuman sa San Pedro Square sa milabay’ng 34th Kadayawan Festival.
Subay niini nakig koordinar na ang TFD ngadto sa komunidad Roxas Night Market alang sa pagabuhatong seminar karong Agosto 6 ug 7, 2019.
Dugang sa labaw sa TFD nga si Councilor Ma. Belen Acosta, head sa Committee on Safety and Security sa 19th City Council, ang magprepara sa draft sa maong resolusyon.
RadyoMaN Jason Amisola
