Davao City – Gipaniguro karon sa Commission on Election (COMELEC-Davao Office) ang limpyo ug walay limbong nga piniliay karong taliabot nga May 13, 2019.
Gipasalig ni First District Election Officer Atty.Krishna Caballero nga malauman sa katawhan nga adunay integridad ug mamahimong hinlo ang umaabutay nga eleksyon.
Ning tuiga, dili na Precinct Count Optical Scan (PCOS) machines ang gamiton sa COMELEC kon dili ang Vote Counting Machine (VCM) nga gama sa nasud sa Taiwan.
Ang VCM mas masaligan tungod kay paspas kini gumikan sa updated processor nga anaa niini, random access memory 32 ka beses ang gidak-on ug dunay 512 beses ang external memory capacity itandi sa PCOS machines nga gigamit niadtong 2010 ug 2013 elections.
Ang COMELEC dili na usab mugamit og compact flash cards tungod sa external storage media nga anaa sa sa VMC diin reliable usab ang SD card nga gamiton diin gawas niana, ang makina aduna sa’y audio review.
Sa ka-high tech ug ka-moderno sa VCM, hayan maglisud ang mga IT experts sa pag-hack sa system aron manipulahon ang resulta sa mga boto ug padaugon ang mga kandidato nga mikuha sa ilang serbisyo.
Segun ni Caballero, ila usab pahugtan ang pagbantay sa mga kandidato nga mamalit og boto maingon man niadtong manghatag og sample ballots bisan sa adlaw sa pagboto mismo sa sunod semana.
Karong adlawa, ang COMELEC magpakatag na og mga pulis ug sa mga sakop sa Task Force Davao mga polling precincts sa tumong nga masanta ang mga kandidato nga manikas sa eleksyon.
Nanganti ang election officer nga kadtong mga kandidato nga manlimbong sa eleksyon, tino gayud nga mag-atubang sila og kaso nga maoy musuway og limbong sa eleksyon sunod semana.
RadyoMaN Joel Viray
