General Santos City—gidala sa ospital ang usa ka lalaking may diperensya sa panghuna-huna nga itago lang sa pangalang alias Abedin, 27, residenti sa Poblacion, Malapatan, Sarangani Province human niining gigabas ang iyang kaugalingong liog.
Subay sa report gikan sa Police Station 3 nasuta nga alas 6:45 ang takna sa gabie usa ka Orlando Dela Peña, 35 anyos, habal-habal driver ang mireport sa ilang buhatan kalabutan matud pa sa usa ka lalaking misuway ug hikog sa may Ardonia St., Barangay Lagao Gensan.
Paspas sab nga mirespondi ang kapulisan diin pag abot sa lugar ila dayon nakit-an ang biktima nga nagkadugo mao nga ilang gidala gilayon sa Dr. Jorge Royeca Hospital.
Gilayon nga gipailawom sa medikasyon ang nasangpit nga biktima apan alas 7:20 ang takna subli silang nakadawat ug report gikan sa Dr. Jorge Royeca Hospital nga misibat ang nasangpit nga biktima. basi sa report, gisumbag sa nasangpit ang CSU dayon dagan gawas sa maong ospital.
Gilayon sab nga naghimo ug aksyon ang kapulisan pinaagi sa pagpangita sa biktima, kung asa siya subling nakaplagan sa may Fernandez St., sa samang barangay. Subli usab nga gibalik sa Dr. Jorge Royeca hospital ang nasangpit ug padayon na karon nga nagpailawom sa medikasyon.
