Davao City – Interesado nga unang magpabakuna si Island Garden City of Samal (IGaCoS) Mayor Al David Uy kung aduna na silay Coronavirus Disease 2019 (COVID-19) vaccine sa lugar sa tumong nga madasig ang taga Samal nga magpabakuna.
Sa interbyu sa DXDC RMN Davao kang IGaCoS Mayor Al David Uy, gibutyag niini nga halos 45% sa taga Samal ang dili gusto nga magpabakuna samtang ang uban undecided o dili pa makadesisyon.
Giawhag ni Uy ang publiko nga magpabakuna aron nga mabalik na sa normal diin mismong siya willing nga unang magbakuna sa pagdasig sa iyang mga residente.
“Para sa akoa, regardless ang efficacy ana, 50% is better than zero. Gusto man nato mubalik og normal, so naa nay vaccine. If given the chance? magpabakuna ko, para lang mutaas ang kumpyansa sa taga Samal nga magpabakuna,” matud ni Uy.
Sa pagkakaron, aduna nay negosasyon ang lokal nga gobyerno sa mga pharmaceutical companies, diin nagbaton na usab kini og non-disclosure agreement sa AstraZeneca.
Gibutyag usab sa Alkalde nga sa bulan sa Hulyo o Oktubre karong tuiga, gilauman sa lokal nga panggamhanan magbaton na og bakuna ang Samal ug gilayong sugdan ang ilang vaccination program.
RadyoMaN Kirby Manzon
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
