MAYOR CLIMACO YA ORDENA CON EL OTORIDAD MAS INTENSIFICA EL CAMPANYA CONTRA CRIMEN Y ILLEGAL ACTIVIDAD QUE TA CONTINUA OPERA AQUI NA CIUDAD

El Alcalde Beng Climaco Salazar ya ordena con el otoridad para mas intensifica este anyo el campanya contra illegal actividad y crimen que ta sosede aqui na ciudad particular el droga, juego illegal, contrabando matansa y abuso na maga mujeres y menor de edad.
Asegun con el alcalde Climaco desgustao ele uwi maga noticia como de abuso sexual que donde maga victima menor de edad. Del mas resiente lang otro seis anyos bata mujer el victima de abuso sexual y matansa con un pulis, ya ordena si mayor Beng con el hepe del pulisiya local Ssupt. Neri Vincent Ignacio para conduci mas ondo imbestigasion y cohi con el maga embuelto.
Afuera de ese, quiere ya tamen si Mayor Beng man deputize el customs con el maga pulis y militar cay grande ayuda ambos el pulis y militar na campanya contra smuggling aqui na ciudad pero tan release lang con el maga contrabando porcaosa na maga tecnikalidad.
Anoche lang el Philippine Coast Guard ya coji cn un lancha el MV/J-PHIA ta carga poco mas o menos 50 mil saco de aros de 50 cada kilo que ta suspecha maga contrabando porcaosa nuay maga pertinente documento. Asegun con Capt. Romy Gaban el District Commander del Coast Guard Western Mindanao, Con el lancha ya columbra na la mar del sibugay donde posible estaba na otro nacion pero maga Filipino el crew y capitan. Ahora ya entrega ya na opisina del customs aqui na ciudad con el lancha chene contrabando para el propio inventoryo y disposition.
Mientrastanto, ta esperansa el alcalde Climaco que este anyo 2018 puede el otoridad menora maga crimen y illegal actividad ta conduci aqui na ciudad. enantes aga durante el primer flag raising ceremony ya empesa destrosa con el maga confiscao items del 2017 como maga open muffler, slot machine, boga, firecrackers y otro pa. este un indicasion que serioso el govierno local na campanya contra coneste.