Nakaluwas sa kamatayon ang Mayor sa lungsod sa Daanbantayan nga si Mayor Vicente Loot sa dihang giambush ang iyang convoy sa Maya Port Daanbantayan alas 7 kaganihang buntag.
Matud ni Loot sa exclusive interview sa DYHP nga gikan sila sa Malapascua Island aron motambong og koronasyon kagabii, ug karong buntag mao ang ilang pagpa uli sakay sa roro vessel.
Apan wala pa gani siya makanaug sa roro vessel, kalit lang nagkagubot sa pantalan tungod sa pagpamusil diin ang sakyanan nga nag una sa convoy nga gisakyan sa yaya ug ang driver maoy naigo sa pagpamusil.
Nagkanayon si Loot nga kauban niya sa biyahi ang iyang pamilya ug pamilya ni Board Member Sun Shimura.
Ang mga mamumuno luwan sa usa ka puti nga van.
Matud ni Loot nga posibling siya maoy target sa ambush.
Wala hinooy matumbok si Loot kon kinsa ang mastermind sa kremin.
Niingun ang mayor nga wala usab siya makadawat og death threat.
Ang nasamdan nga yaya luwas ra sa makuyaw nga kahimtang.
Kahinumduman nga si Loot usa sa retired general nga ginganlan ni Presidente Rodrigo Duterte nga nalambigit sa iligal nga drugas.
