Ginkumpirmar ni Atty. Mark Piad, spokesman ni Mayor Jed Patrick Mabilog nga nagakabalaka ang alkalde sa seguridad sini kag sang iya Pamilya kabangdanan nga wala pa ini nagbalik sa trabaho apisar natapos na ang iya sick leave.
Suno kay Atty. Piad nga nag-extend sang isa pa ka bulan nga leave ang alkalde bangud wala pa ini lubos maka-recover sa ginabatyag bangud sa stress kag kahadluk nga may malain nga matabu sa ila kon magbalik sa siyudad.
Ginhatagan pagtamod ni Piad nga posible man nga indi pag-ubuson ni Mayor Mabilog ang isa ka bulan nga extension sang leave sini kag magbalik na sa trabaho.
Madumduman nga nagpadulong sa Japan si Mayor Mabilog sang una nga semana sang Setyembre apang nagderetso na ini sa pagbakasyon bangud nabalaka nga indi ini safe kon magbalik sa siyudad bangud sa paghingabot sang Presidente sa isyu sang illegal nga druga.
