Nangin finalist si Bacolod City Mayor Evelio ‘Bing’ Leonardia sa Asia Leaders Awards ukon ALA 2018 sa diin isa siya sa duha nga na-nominate sa 20 ka mga categories lakip na ang Lifetime Excellence Award kag Mentor of the Year Award. Wala labot sini, finalist man ang Bacolod City sa Tourism Company of the Year Award.
Ginakilala sang ALA ang mga persona gikan sa nagkalain-lain nga industriya nga nagapakita sang exemplary leadership kag nagabulig sa pagpatin-ad sang pungsod bilang premier business hub sa Asya. Suno kay Leonardia, ang nominasyon nga iya nabaton ang indi personal bangud ano man nga pagkilala ang mabatunan sang ciudad ang tungod man sa pumuluyo sang Bacolod.
May pulo tanan ka nga persona ang lakip sa board of judges sang ALA gikan sa nagkalain-lain nga industriya. Patigayunon ang awarding ceremony sa November 15, 2018 sa Makati Shangri-la Hotel. *rcsg*
