Ni Alfonso T. Ruda
Makaangkon na ug kasulbaran ang problema sa mga mag-uuma may kalabutan sa abono.
Kini human gipahayag ni Mayor Evan Hope Olvis nga molugway ug pautang nga abono ang Kagamhanang-Lokal sa Polanco pinaagi sa buhatan sa Municipal Agriculturist ngadto sa mga mag-uuma nga way sarang ikapalit ug abono.
Ang pasalig giluwatan sa alkalde sa gipahigayong Polanco Municipal Agriculture and Fishery Council First Quarterly Meeting dili palang dugay didto sa Farmers Training Center sa Sitio Canibungan, Barangay Villahermosa lungsod sa Polanco.
Sumala pa ni Mayor Olvis, ang gidaghanon sa ipautang nga abono mag-agad sa himoong pagsusi sa mga personahe sa MAO sa gidak-on sa basakan sa aplikante. Hinuon iyang gitataw nga bayran sa mag-uuma ang gipautang nga abono pagkahuman sa ani aron mapakapaimulos usab niini ang ubang mag-uuma.
Sayo niini gibutyag ni Mayor Olvi nga iyang gipadak-an ang pahat para sa agrikultura karong tuiga, partikularmente sa mga Farm technician aron kanunay nilang mabisita ang mga mag-uuma ug mahatagan sa ilang mga panginahanglan.
Alayon niini, giawhag ni MAFC Chairman G. Fausto Empeynadp ang mga mag-uuma nga suportahan ang programa sa alkalde aron makaangkon ug kalambuan ang kalidad sa ilang kinabuhi.
Ang padayong pagpaningkamot ni Mayor Olvis nahasubay sa iyang damgo nga himoong agro-industrial municipality ang lungsod sa Polanco ug mapalambo ang kalidad sa kinabuhi sa mga Polancohanon.
