General Santos City–Dismayado si Gensan City Mayor Ronnel Rivera sa nahimong distribution sa financial assistance sa mga benipisyaryo sa Social Amelioration Program (SAP) sa pipila ka barangay ning syudad human nga wala nasunod ang social distancing.
Sumala sa Mayor nga aduna may mga barangay nga mituman apan aduna usay wala makontrola ang pagtapok sa mga tawo nga mi-claim sa SAP human nga nagdasok sa mga lugar kung asa gipang-apod apod ang ayuda.
Gipaklaro usab ni Mayor Rivera nga iyang nasabtan nga ipit na kaayo sa oras ang distribution tungod adunay gisunod nga deadline subay sa kamanduan sa national nga buhatan sa DSWD apan unta gisunod gihapon ang social distancing.
Gihingusgan usab sa Mayor nga dili siya uyon nga susama gihapon niini ang mahitabo sa pagpang-apod apod ug ayuda gikan sa Local Social Amelioration Program sa LGU Gensan mao nga iyang gihangyo sa mga Barangay nga maghimo ug sistema aron nga masunod ang mga regulasyon nga ginapatuman alayon sa pagbatok sa Covid-19.(CDS)
