General Santos City–Gi-angkon ni Gensan City Mayor Ronnel Rivera nga gipadal-an niini ug sulat ang pamunuan sa Bureau of Fire Protection Gensan nga gamiton na sa lokal nga panggamhanan ang yutang gitindugan sa ilahang buhatan. Sumala niya nga sulod sa taas nga panahon, walay papeles nga gihuptan ang BFP nga ginatugutan silang mogamit sa maong luna.
Nasayran nga ilalom sa administrasyong Duterte, gihatagan ug kaugalingong budget ang mga national agencies para sa ilahang kaugalinong building ug yuta. Apan giklaro ni Mayor Rivera nga sa karon, ilaha pang ginahulat ang tubag sa Regional Office sa Bureau of Fire Protection Region 12 alang sa maong hisgutanan. Dugang pamahayag ni Mayor Rivera nga andam kanunay ang lokal nga panggamhanan sa paghatag ug assistance sa tanang buhatan sa gobyerno sama sa assistance nga ginahatag nila sa kapulisan.
Apan sa gihimo matud pa ni Fire Chief Inspector Lowyn Amoyar, Fire Marshal sa BFP-Gensan, daw sa dili na nila kinahanglan ang lokal nga panggamhanan sa pagtuman sa ilahang mandato. Kahinumduman nga niugat ang issue human gipadad-an ug suwat ni Amoyar ang mga kontraktor nga iundang ang construction sa ilang mga proyekto gumikan matud pa sa pipila ka mga bayolasyon ug dili pagsunod sa mga rekositos nga nakalatid matud pa sa Fire Safety Code.(LVR)
