General Santos City— Malaumon si gensan City Mayor Ronnel Rivera nga mahimong sulbad sa problema sa Mindanao ang ginadusong Bangsamoro Organic Law kon BOL.
Saysay niya nga normal lang nga adunay mga nagababag gumikan sa unsang kabag-uhan nga ginaduso aduna gyu’y pipila nga dili uyon sama sa BOL.
Apan alang aniya, isip chairman sa Regional Development Council sa rehiyon, angayan matud pa ga kini suportahan hilabina nga adunay lakang nga ginahimo ang gobyerno aron nga matapos ang mga kagubot nga gina-atubang sa Mindanao.
Samtang sa hisgutanang siguridad, gibutyag ni Mayor Rivera nga aduna nay nakalatag nga security plan ang dakbayan sa Gensan sa unsa mang posibleng mahitabo.
Sumala niya nga kanunay ang ilahang ginahimo nga koordinasyon sa kapulisan ug militar hilabina sa walo ka prisinto sa dakbayan aron nga mapabilin ang kalinaw sa syudad.
Padayon usab ang iyahang panawagan ngadto sa katawhan nga magpabiling mabinantayon ug magpakabana sa palibot. Higayon matud pa nga adunay makadudahang butang nga makit-an gilayon kining ipaabot sa otoridad.
