Tapaz, Capiz- Nakapauli na sa tagsa nila ka mga poluy-an sa Barangay Lahug, Tapaz ang mga pomuluyo nga napilitan nga mag-evacuate matapos ang maduguon nga joint operation sang mga otoridad sang nakaligad nga Disyembre 30, 2020 kun sa diin siyam (9) ka mga tumandok ang nagkalamatay.
Suno sa alkalde, ginsabat sang LGU sang Tapaz ang mga kinahanglanon sang mga ini kaangay sang pagkaun samtang nagatiner ang amu nga mga pamilya sa Tapaz covered gym.
Samtang ginmandu man sini ang pagpadala sang team nga ginabug-osan sang mga personnel halin sa MSWDO kag mga nurses padulong sa Barangay Lahug, Tapaz agud nga magpatigayon sang pag-eksamin sa ikaayong lawas sang mga ini subong nga nakapauli na sila sa tagsa nila ka mga panimalay.
Madumdoman nga yara sa 300 ka mga indibidwal ang ginpakamaayo nga mag-evacuate sa Poblacion, Tapaz bangud sa kahadluk kag kahangawa nga nabatyagan sa ila seguridad matapos ang maduguon nga operasyon.
