General Santos City–Giangkon karon ni Isulan Mayor Marites Pallasigue nga gamay nalang gyud ang pondo sa ilahang lungsod gumikan sa padayong pakigbatok sa Covid-19.
Apan gibutyag ni Mayor Pallasigue nga aduna silay igong resources sa karon gumikan nagpabilin pang manageable ang sitwasyon apan dili matud pa niya masiguro kung hangtud kanus-a nila ma-kontrola ang sitwasyon.
Samtang sa hisgutang hospital, usa lang matud pa ang dako nga hospital nga naga-cater sa ilahang covid positive ug dili matud pa niya masulti kung hangtud asa ang kapasidad niini.
Dugang pamahayag ni Mayor Pallasigue nga sa karon, surender na gyud sila sa kadaghan sa mga LSI ug ROF nga nanguli ug dugangan pa sa kapin 300 nga na-contact trace sa usa ka 61 anyos nga magtutudlo nga namatay sa covid.
Pasalamat matud pa siya gumikan mi-ubos ang ihap sa mga LSI nga naga-uli sa ilahang lugar, ingon man wala nahinayon ang pag-abli sa klase gumikan temporaryo nilang gigamit ang mga tunghaan isip isolation facility.
Sa karon, ginaplanohan na usab sa lokal nga panggamhanan sa Isulan nga magpatukod ug laing isolation facility aron lang mahatagan ug pagtagad ang tanang gikinahanglan nga i-isolate.
Kalabot niini, nanawagan karon ang Mayor sa tanang residente sa Isulan nga tumanon ang tanang protocol nga gina-implementar sa gobyerno.
Tumong niini aron malikayan ang pagkatag sa virus. Kung wala matud pa himuon sa gawas, mas maayong magpondo sulod sa balay gumikan sa karon, dili na masayran kung si kinsa ang infected sa virus o dili tungod adunay mga positibo nga asymptomatic.
Pagpaklaro niya nga walay ni bisan kinsa ang may gusto sa sitwasyon karon busa hangyo niya sa katawhan nga mag-cooperate sa gobyerno.(LVR)
