Padayon sa paghatag ug pahimangno sa ilang katawhan si Alabel mayor Vic Paul Salarda kalabot sa padayon nga pagsaka sa ihap sa mga nagpositibo sa covid-19 sa lungsod.
Sumala sa Mayor nga sa karon base sa ilang record aduna nay 27 ka kaso sa nag positibo sa Covid-19 sa Alabel, sa maong ihap, walo ang aktibong kaso samtang duha ang nakabsan ug kinabuhi. Matud sa Mayor nga dili dapat baliwalaon sa katawhan ang bahad sa Covid-19 hilabina nga aduna nay nakabsan ug kinabuhi sa mga nagpositibo.
Samtang giawhag usab sa Mayor ang mga adunay direct contact sa mga nagpositibo sa covid sa ilang lungsod nga dili na i-deny aron nga sila ma-isolate gilayon. Dili na dapat nga hulaton pa sa mga nasangpit nga mataptan sa virus ang ilang miyembro sa pamilya ayha pa magpa-quarantine. Ang lokal nga panggamhanan matud pa sa lungsod ang maghatag ug tabang ngadto sa mga nasangpit samtang sila anaa sa isolation Facility.
Samtang gikumpirma ni Mayor Salarda nga sa 13 ka mga barangay adunay 5 ka barangay ang nasudlan ug Covid-19. Sa barangay Poblacion anaa sa 17 na ang nagpositibo, sa Kawas lima, sa Maribulan duha, samtang sa barangay Spring ug barangay Ladol adunay tig usa. Samtang walo ka barangay ang nagpabiling Covid-free pa hangtud sa kasamtangan ug nanghinaot ang Mayor nga unta dili sila masudlan ug virus.
