TACLOBAN CITY – Naghatag na hin direktiba an pamunuan han Police Regional Office 8 kan Samar Police Provincial Director PSSupt Nicholas Torre nga kuhaon an statement han biktima nga hi Aran Boller, usa nga Mayoralty Candidate han Matuguinao Samar, matapos pagmumusilon han diri pa nakikilala nga mga suspek.
Sumala kan PCSupt. Dionardo Carlos, Regional Director han PRO8, importante nga masabtan han PNP an impormasyon nga ighahatag ni Boller agud makilal-an an nagpapalyo han plano nga pagpatay ha iya.
Ha pagkayana in nagpapatambal na hi Boller matapos ini maigo ha tuo nga parte han iya kamot.
Dugang pa han pamahayag han opisyal, nagpapadayon an gindudumara nga imbistigasyon han mga kapulisan ha insidente. Gin-aaro gihapon an partisipasyon han publiko ha pagbulig ha otoridad agud makilal-an an mga suspek.
Samtang, ginsiguro naman han PNP ngan Phil. Army an padayon nga pagmonitor ngan koordinasyon agud malikyan an pareho nga sitwasyon ilabi na ha probinsya han Samar.
