iFM Laoag – Natay kalpasan a nakuryente ti maysa a balasang iti ili ti San Nicolas, Ilocos Norte.
Nabigbig ti biktima a ni Crista Jessica Mammuad, agtawen ti 17, maysa nga estudyante ken residente iti Barangay 8 iti nasao nga ili.
Basar iti impormasyun manipud ken ni kabsatna a ni Allan Mammuad, aglablaba ti biktima idi ta nakitana a nakadata iti kabsatna ket pagarupenna a naawanan laeng ti puot daytoy gapu ti bannog. Angem, nakigot laengen isuna gapu ta aglitlitemen ti kabsatna a nakaigem iti extension wire ken sisasaka pay daytoy.
Dagus a rinabsut ni Allan ti nakasaksak a waya ket ditoy a nagpaarayat kadagiti karruba ken kabagianda.
Naitaray iti Black Nazarene ti biktima ket nai-revived pay daytoy babaen kadagiti doktor a nangtutok kenkuana, angem, pimmusay metlang kalpasan iti sumagmamanu nga oras.
Nupay kasta, bayat ti kaadda iti biktima iti ospital, ditoy met a naatake ti amana idin a nadamagna a nakuryente ti balasangna. Nakaconfine iti Intensive Care Unit (ICU) ni amada ken naiyawid metten iti pagtaengan ti bangkay ti balasang.
Nagpalagip met iti otoridad iti panaganannad nangnangruna iti panagusar iti extension wires nu nabasa iti ima ken kasta pay a sisasaka – ngamin ta ‘good conductor’ wenu alisto a kapten ti kuryente iti danum.
Bernard Ver, RMN News
