iFM Laoag – Napalaus ti panagyaman ti maysa a mangisursuro iti maysa a tricycle driver iti Siudad ti Laoag a nabigbig a ni Ernesto Basilio, agtawen ti 28 ken residente iti Barangay 28 kalpasan nga insublina ti bag a natnag iti uneg ti tricycle.
Nabigbig daytoy mangisursuro a ni Professor Herdy Yumul. Sigun ti istoryana, nagturong daytoy iti maysa a pagadalan (INCAT) ket nagserbi a huwes iti maysa a pasalip. Bayat a sumsumrek isuna iti pagadalan, ditoy a nadlawanna a mapukpukaw ti bagna ket sinublianananna ti naglugananna a tricycle ngem nakadayu daytoyen.
Nupay kasta, insubli ti nasayaat a tricycle driver ti nasao a bag kaduana ti pagayamna a ni Pastor Ceasar Emmanuel Maala iti pagadalan a nagturongan ni Maestro Yumul. Naragsakan ti mangisursuro ken imbatadna nga adda nagyan a P30,000.00 – daytoy pagpasweldona iti obreros nga agtartarimaan ti balayna.
Gapu kadaytoy, kalikagom ti mangisursuro nga agsurat iti gobierno ti siudad ti Laoag tapnu maipakaammo dagitoy nasayaat a driver ti tricycle.
Malagip, a ni Ernesto Basilio ket dati a mapadaydayawan ti kinasayaatna gapu ta isubsublina dagiti maibati dagiti pasaherosna.
Mensahena kadagiti padana a driver iti “panagserbi a napudno, numan pay nanumo kadagiti padana nga ilokano”.
