MDDRMO: Landslide sa Pantukan, Davao de Oro walay casualty

Davao City – Walay natalang casualty sa nahitabong lapad nga landslide sa Diat Palo, Barangay, Napnapan, Pantukan, Davao de Oro kagahapon sa kaadlawon (July 15, 2022) gawas lang sa upat (4) ka bunkhouse sa mga minero nga naguba tungod sa pagdahili sa yuta.

Sa interbyu sa DXDC RMN Davao kang Jocelyn Rivas, personahe sa Pantukan Municipal Disaster Risk Reduction and Management Office (MDRRMO), gibutyag niini nga sayo nakahikling ang mga residente sa dihang nagsugod og dahili ang mga bato ala una sa kaadlawon.

“Walay (casualty) kay sayo man nila nabantayan nga naay mga bato nga nangahulog. Nag-evacuate sila. Tapos mga alas 4 nahitabo ang landslide,” saysay ni Rivas.

Gilayon usab nga nagpahigayon og ocular inspection sa area ang MDRRMO, Provincial DRMMO, Mines and Geosciences Bureau (MGB) ug Municipal Environment and Natural Resources Office (MENRO).

Gipasabot sa MDRRMO Pantukan nga kanunay ang ilahang pagpahimangno labi na sa mga minero sa mga angay himuon aron malikayan ang disgrasya sa ilang trabaho.

RadyoMaN Kirby Manzon