MDRRMO New Bataan: Mag. 5.9 nga linog walay casualty, 2 eskwelahan nakitaan og damyos

Davaao City – Gikumpirma sa Municipal Disaster Risk Reducation and Management Office (MDRRMO) sa New Bataan, Davao de Oro nga walay reported casualty human ang magnitude 5.9 nga linog nga misentro sa lugar alas 2:58 sa kaadlawon, October 20, 2023.

Sa interview sa DXDC RMN Davao kang Lynne Dollolasa, MDRRM officer sa New Bataan, iyang gibutyag nga adunay mga natala nga damyos ilabi na kadtong mga eskwelahan nga nakitaan na og cracks sa nahitabong linog niadtong Pebrero ug Marso karong tuiga. Nasayrang gilayon usab nga nagdekalara og province-wide suspension of classes sa Davao de Oro kagahapon tungod sa linog.

Dugang ni Dollolasa nga adunay reported nga pagdahili sa bato ug yuta sa Sitio Pongpong, Barangay Andap, New Bataan ug kini padayon nga ginakumpirma sa otoridad.

“Naa tay reported nga naay damaged ang atoang Camanlangan National High School ug ang atoang Davao de Oro State College branch sa New Bataan. Sa kasamtangan, gilibot sa RDANA team ang tanan nga mga barangay aron masuta ug ma-validate kung unsa ang mga damage nga naa didto pud sa mga barangay,” matud ni Dollolasa.

Padayon karon nga gipaigmat sa lokal nga panggamhanan ang mga residente ilabi na nga ubay-ubay usab ka mga aftershock ang ilang nasinatian human ang kusog nga pagtay-og.

RadyoMaN Kirby Manzon