Desidido ang usa ka media man nga mopasaka ug kasong criminal ug administratibo batok kang Vice Mayor Francisco Gonzales sa lungsod sa Dapa, Surigao del Norte human siya nakatilaw ug sumbag sa kumo sa maong opisyal niadtong adlawng Sabado, Septembre 23 ning tuiga.
Saysay sa biktimang si Ed Mapayo, usa ka magsusulat sa newspaper didto sa Surigao del Norte, nga wala siya magtoo nga buhaton ni Vice Mayor Gonzales ang pagsumbag kaniya tungod sa kadaghan sa mga bisita lakip pa si Sec. Paulyn Ubial sa Department of Health ug mga opisyal sa rehiyonal nga buhatan.
Kalit lang siya’ng giduol ni Vice Mayor Gonzales ug gisumbag katulo ka higayun igu sa iyang tangkugo.
Aron malikayan nga mabulabog ang programa niadtong tungura, nibiya sa lugar si Mapayo ug midretso sa Police Station aron ipatala ang insidenti.
Kagahapon nakuha na ni Mapayo ang resulta sa medical examination ug hayan nga gamiton kini sa pagpasaka ug kaso batok sa maong Bise Mayor.
Gitawagan sa DXBC ang bise mayor apan nag dumili kini pag tubag ug pag pa interview. Bukas ang sibyaanan alang sa iyang side.
