Medical community nagaapelar sang duha ka semana nga ECQ sa Bacolod

Nagaapelar karon ang medical community sa ciudad nga ipaidalum ang Bacolod sa enhanced community quarantine (ECQ) sa sulod sang duha ka semana.

Pirmado nanday Dr. Ma. Ivy V. Malata, Philippine Medical Association – Canlaon Medical Society President kag Dr. Roberto Puerta, Philippine Medical Association – Negros Occidental Medical Society President ang nasambit nga sulat nga gin-address kay Pangulong Rodrigo Duterte.

Nabutang sa appeal nga may yara sang gulpyada nga pagsaka sang mga kaso sang COVID-19 sa komunidad sa nakaligad nga mga inadlaw kag madamo pa nga mga pending results ang manugabut.


Pila man ka mga ospital ang nagdeklarar nga puno na ang ila COVID-19 facilities kag pila man ka mga healthcare workers kag frontliners ang gaka-admit ukon yara sa home quarantine.

Nagahingyo sila sa National Inter-Agency Task Force sang at least two weeks nga pagpaidalum sang Bacolod City sa ECQ para makabulig sa pag-contain sang virus.

Dugang pa sang sulat nga indi equipped ang mga ospital sa ciudad para sa isa ka “full-blast” nga pakigbato sa COVID-19.

Nagapati man ang grupo nga indi na malayo nga kita diri ang madason nga epicenter sang sakit sa Pilipinas.

Naghatag man sang pila ka suhestyon ang grupo sa local government unit sa away batuk sa COVID-19.

Lakip na diri ang extensive contact tracing, unified protocols sa tanan nga healthcare facilities, pag-improve sang swabbing techniques kag protocols sa mga returning locally stranded individuals kag overseas Filipinos.

Ila man ginaduso ang istrikto nga pagpatuman sang rules kag standards sang LGU sa new normal, data pooling sang COVID-positive patients sa ciudad kag paggamit sang digital surveillance system pinaagi sa mga QR codes para mahibalu-an sa mga establisyemento kon sin-o dapat ang naka-quarantine.

Sa ulihi, ginaku sang mga ini nga kapoy na kag nahadlok ang medical community sa Bacolod rason nga nagapangayo na sila sang bulig halin sa National IATF kag kay Pangulong Duterte.

Facebook Comments