Membro sa NPA nga gilubong ug taga tuhod sa iyang mga kauban, gikalot sa kasundaluhan sa Maragusan, Davao De Oro

Davao City- Gumikan sa impormasyon nga gihatag ni kumander Jeg, misurender nga commanding officer sa NPA Guerilla Front 2, natultulan sa mga kasundaluhan ug kapulisan ang gilubngan sa patay nga lawas ni Leonardo Ellera Sr. sa Barangay Caranobe, Maragusan, Davao De Oro.

Gibutyag ni Army Major Roberto Escalona Jr., civil military officer sa 1001ST brigade nga si Ellera kanhing squad leader sa GF2 ug gilubong sa iyang mga kauban sa kalihukan human mamatay tungod sa balatian.

Nagkanayon si Major Escalona, nga napugos ang mga kauban sa namatay nga NPA nga ilubong nalamang kini sa tagatuhod gumikan sa pagdali-dali aron dili maabtan sa labihang combat operation sa kasundaluhan sa Davao De Oro.

Nisakse ang anak nga si Leonardo Ellara Jr. sa pagkubkub sa mga bukog ug mismong si kanhing kumander Jeg maoy nikumpirmar nga ang nakalotan nga kalabera sa iya kining amahan.

Human ma-proseso sa Maragusan Municipal Health Office, daling gihatud sa 1001ST brigade Philippine Army ang kalabera sa NPA sa iyang pamilya ug gilubong pag-usab sa public cemetry sa Mabini, Davao De Oro.

Gidugang sa opisyal sa kasundaluhan nga nagpadayon ang ilang combat operation sa kabukiran aron dili makakita ug higayon ang mga kumunista nga magpakusog pag-usab bisan paman ug gideklara na nga insurgency free ang Davao region.

RadyoMan Erin Lumosbog