Giaprubahan ug gipasar karon sa mga sakop sa Sangguniang Panlalawigan sa Zamboanga del Norte sa pagpangulo ni Vice-Governor ug Presiding Officer Senen O. Angeles ang Memorandum of Agreement (MOA) may kalabot na sa pagpatuman sa multi-milyones nga mga proyekto sa panginabuhi alang sa mga kabus nga mga katawhan sa lima (5) ka lungsod sa tersero distrito nga nahisakop niining probinsiya.
Si Presiding Officer Pro-Tempore Julius C. Napigquit ang mipasupot sa resolusyon nga naghatag sa otoridad ug katungod ni Governor Roberto Y. Uy nga mopirma sa Memorandum of Agreement (MOA) sa ngalan sa probinsiya tali na sa Office of the Presidential Adviser on the Peace Process (OPAPP) pinaagi ni Undersecretary Ronald I. Flores mahitungod na sa pagpatuman sa mokabat sa bayente-nueve (29) ka mga proyekto sa panginabuhian ilawom sa Fiscal Year 2017 Masaganang Pamayanan (PAMANA) nga adunay kinatibuk-ang kantidad nga Php 118, 360,000.00 atol sa gipahigayon nga regular session sa mga magbabalaud sa probinsiya kaniadtong Lunes.
Ang mga barangay diin ipatuman ang nagkadaiyang mga proyekto sa panginabuhi sulod sa lima (5) ka lungsod sa tersero distrito sa Zamboanga del Norte mao ang mosunod: Barangay Poblacion sa Kalawit; Barangays Matiag, Balagonan, Sta. Maria, Latabon, Arabi ug Bucana sa Siocon; Nonoyan, Diangas ug Guinotan sa Baliguian; Sirawai; Barangays Jatian, Kulaguan, Tangarak, Cawit-Cawit, Anongan, Mativoh ug Panganuran sa Sibuco nga maoy magpakadawat sa mokabat sa 29 ka mga proyekto sa panginabuhi ang mga katawhan nga nanimuyo niini ilawom sa PAMANA Program gikan sa OPAPP nga nagkantidad tanan sa Php 118, 360,000.00.
Samtang ang mga proyekto usab nga ipatuman sa gihisgutan nga mga barangay nga nahisulod sa lima (5) ka lungsod sa tersero distrito sa probinsiya nagalangkub sa mosunod: makinarya sa panguma, coconut seedlings, water supply systems, fish sanctuary, solar dryers, smoke house, smoke fish processing, mariculture, agricultural livestocks, Pikit-pikit (100 units), mud crab fattening, evacuation center, pathways concreting, pipe-laying, overhead reservoir, post-harvest facilities, warehouse ug lakip na ang household solar electrifications.
Nasayran nga kini nga programa ang matud pa maoy suporta usab ilawom sa gisagop nga Six-Point Peace and Development Agenda nga gipatuman sa kagamhanan karon ni President Rodrigo Roa Duterte alang sa pagpatunhay sa kahapsay ug kalinaw pinaagi sa catch-up socio-economic development sa mga dapit nga giila sa gobyerno nga talandugon ang kahimtang sa pagpuyo sa mga katawhan niini.
