Davao City – Gikatakdang ipagula karong adlawa sa Department of Health XI ang opisyal nga resulta sa gikuhang sample sa 4-anyos nga pasyente nga gisuspetsahang adunay meningococcemia.
Gibutyag ni DOH Regional Director Dra Anabelle P. Yumang atol sa pakighinabi sa RMN Davao nga gihulat pa nila ang opisyal nga report gikan sa Brokenshire Hospital.
Gikanayon ni Yumang nga gibutyag kanila verbally sa maong ospital nga namatay ang bata tungod sa meningococcemia.
Magpahigayon og usa ka press conference ang DOH Region XI karong adlawa kalabot sa maong kaso ug pagedukar sa publiko sa mga communicable diseases.
Samtang, sumala ni City Health Office head Dra. Josephine Villafuerte nga gipatumar na og prophylaxis ang mga adunay close contact sa pasyente.
Gipasabot niini nga ang meningococcemia dili kini airborne apan makuha kini pinaagi sa droplets
Matud niini dili angay mag-panic ug mukonsulta gilayon sa doktor kung adunay close contact sa pasyente nga na-diagnosed og meningo o adunay mga nakitang sintomas sa maong balatian.
Nagpahimangno ang DOH-XI ug CHO sa publiko nga irespeto ang privacy sa pamilya ug pasyente ug mamahimo usab nga manubag sa balaod ang pagpapakaylap og hulagway sa pasyente diha sa social media.
RadyoMaN Aimee Guinita
