Gimanehuan ang usa ka Suzuki Raider 150, color puti, walay plaka, sa usa Ariel Cagasan, 17 anyos, ulitawo, ug residente sa Purok-1B, Poblacion, Lantapan, Bukidnon.
Sumala sa taho sa kapulisan nga paule gikan sa sentro nga bahin sa dakbayan sa Malaybalay ang maong menor de edad sakay sa iyang single motor, sa dihang pag-abot sa lugar nga nadisgrasyahan, partikular na sa may kurbada nga bahin, nawad-an og control sa gimaneho niini ang maong menor de edad hinungdan sa pagkadisgrasya niini ug pagkabunal ngadto sa kilid nga bahin sa maong dalan.
Gumikan sa maong panghitabo, nakaangkon og nagkadaiyang bali sa kalawasan ang biktima nga daling gidala sa balay-tambalanan apan gideklara nang dead-on-arrival sa doctor.
Hugot ang panawagan karon sa mga personahe sa Traffic Management Center (TMC)-Malaybalay City ngadto sa mga motorista nga magmabinantayon sa kadalanan aron nga mahilikay sa disgrasya.
