Davao City – Emosyonal nangayo og tabang kang Mayor Inday Sara Duterte-Carpio ang mga residente nga apektado sa demolisyon sa Purok 5 Talomo Proper Puan ning syudad karong buntag lang.
Nagtulo ang luha sa mga mata sa pipila ka mga residente sa Puan ning siyudad samtang nagayo sila og tabang kang Mayor Inday nga mahatagan sila og relokasyon aron katukuran sa ilang puy-anan.
Nagdangoyngoy ang usa ka residente nga si alyas Cherryl samtang nagsaysay nga wala sila’y mapuy-an karon nga gipangguba sa demolition team ang ilang mga balay ganinang 8:00 sa buntag.
Segun ni Cherryl nga hangtud dili sila mahatagan og pagtagad sa lokal nga kagamhanan mapugos una sila magpabilin og puyo kilid sa kalsada kung asa nakatikad ang ilang giguba nga mga balay sa lugar.
Nasayran nga muabot sa 30 ka pamilya ang direkta naapektohan sa demolisyon ug sa mao nga gidaghanon usa lang ka residente nga mao si Damaso Cequina ang maayudahan og relokasyon sa syudad.
RadyoMaN Joel Viray
