Lisensyado ang mga armas luthang nga nakuha sa possession ni Mayor Leonardo Escobillo sang Tampakan, South Cotabato matapos nga may ginpresentar ini nga mga dokumento sa raiding team sang ginraid ang iya nga puluy-an sang Lunes sang kaagahon sa Purok 6, Brgy. Maltana sa nasambit nga banwa.
May-angot sini suno kay Police Supt. Romeo Galgo, spokesperson sang Pnp 12 ang bata lang ni Mayor Escobillo nga si Leonardo Escobillo ang mapasakaan sang kaso kon indi ini makapresentar sang nagakaigo nga dokumento matapos nga expired na ang lisensya sang nakumpiskar nga isa kalibre 45 nga armas luthang sang ginraid man ang puluy-an sini.
Sa subong nagapabilin nga yara sa kustodiya sang Tampakan Pnp si Leonard Escobillo.
Gindepensahan man sang pamunuan sang Pnp 12 nga wala sang lamod pamolitika ang ginhimo nila nga pagraid sa alkalde sang Tampakan kag sa bata sini tungod resulta suno pa ini sang ila nga intelligence kag investigation report batok sa nasambit nga opisyal.
