Taliwala sa krisis sa COVID-19, gisugdan sa 55th Engineer Brigade, Philippine Army ang ilang relief operations ngadto sa mga vulnerable families ug sector nga naapektuhan sa gipatumang enhanced community quarantine.
Gamit ang ilang subsistence allowance, nanghatag og food packs ang mga sundalo kinsa nahidangat sa Lanao areas niadtong 2018 aron motabang sa rehabilitation sa Marawi City.
Priyoridad sa ilang relief operations mao ang mga internally displaced persons (IDPs) o mga pamilyang nawad-an og pinuy-anan ug mga kabtangan tungod sa giyera sa Marawi niadtong 2017.
Gitawag og “Tulong Mula sa Inyong Mga Sundalo, Mula sa Aming Puso, Para sa Kababayang Pilipino”, dos mil ka mga (2,000) pamilya ang ilang nahatagan og food packs nga dunay lima ka kilo nga bugas, lima ka sardinas, lima ka pakete nga noodles, unom ka pakete nga kape ug asukar.
Ang subsistence allowance sa military maoy budget sa mga sundalo alang sa ilang inadlaw-adlaw nga pagkaon nga nagkantidad sa 150 pesos matag adlaw.
Matud pa ni Brigadier General Nestor Abando, commander sa 55 Engineer Brigade, gihimo nila ang maong lakang tungod kay nasayod sila nga dili mahatag tanan sa gobyerno ang tanang panginahanglanon sa tanang mga Pilipino. (Divina M. Suson, Philippine Army, April 24)
