Roxas City, Capiz – Magabaton sang insentibo nagikan sa gobyerno probinsyal sang Capiz ang duha ka mga atleta nga nakakuha sang medalya sa Southeast Asian Games bilang isa sa pamaagi nga mahatagan ang mga ini sang pagpasidungog.
Ginpahayag ni Gov. Antonio del Rosario nga sandig sa ordinansa sang probinsya magabaton sang P50,000 si Denis Dumaan sang Panit-an, Capiz, ang gold medalist sa Southeast Asian Games samtang P20,000 naman ang mabaton sang bronze medalist nga si Ric Rod Ortega sang Panay, Capiz.
Nakapagkit sa ordinansa nga makabaton sang P50,000 ang mga atleta nga nakakuha sang gold medal sa mga international sports event kag P30,000 naman ang para silver medal kag P20,000 ang bronze medal.
Pagatinguhaan man sang provincial government nga mapadasig ang paghatag sang insentibo sang nasambit nga mga atleta nga naghatag sang kadungganan sa probinsya sang Capiz.
Sa madumduman nga nasungkit ni Dumaan ang gold medal samtang nakuha naman ni Ortega ang bronze medal sa Pencak Silat sa Sea Games nga ginpatigayon sa Kuala Lumpur, Malaysia.
