Gikumpirma ni Barangay Bulua Kapitan Al Legaspi Jr., nga nag blood test sa mga baboy sa Zone 8, Bulua ang City Veterinary Office o City Vet niadtong miaging semana ug ilang nasayran ang resulta niadtong adlawng Sabado.
Busa dali silang nagpahigayon og meeting uban ang Department of Agriculture kon D-A ug city vet human nasayran nga positibo sa African Swine Fever o A-S-F ang mga baboy.
Kagahapong adlawa, gisugdan ang pag-culling sa mga baboy sa area gikan sa 500 meters nga radius ilabi na nga adunay nahitabong pagluya sa mga baboy.
Aduna matud pay nasapon silang Kapitan Legaspi nga gipambaligya ang mga baboy.
Matud ni Kapitan Legaspi nga ila dayun kining gilakag tungod kay peligro kini nga mokalat sa ubang barangay.
Giklaro usab ni Kapitan Legaspi nga Zone 8 lang sa Barangay Bulua ang nasakop sa 500 meter radius tungod kay dako dako usab kini nga area.
Nasayran nga gidili pa sa D-A ug Cityvet ang pagbuhi sa baboy sa area sulod sa lima ka tuig.
