Mga bag-ong events laoman sa 32nd Kadayawan Festival

178

Davao City- Daghan ang kabag-ohan sa mga events nga ipahigayon sa syudad sa Dabaw subay sa selebrasyon sa 32nd Kadayawan sa Dabaw.

Sa pakighinabi sa DXDC RMN Davao kang Kadayawan Festival director Gatchi Gatchalian, gisulti niini nga duna’y kabag-ohan hilabi na sa mga dagkong events sa Kadayawan.
Matud ni Gatchalian, inay sa Davao City Recreation Center kun Almendras Gym ipahigayon ang Hiyas sa Kadayawan karong Agosto 18, gibalhin na kini sa USEP Gymnasium sa Bo. Obrero, syudad sa Dabaw aron nga mas daghan ang makasalmot sa selebrasyon tungod dunay 5,000 seating capacity ang USEP Gym.

Sumala ni Gatchalian nga gawas niini, duna na sab Pitik sa Kadayawan o drumbeaters competition sa Pamulak sa Kadayawan karong Agosto 20 sa alas otso sa buntag aron mas mahimong sadya ang pagparada sa mga floral floats. Samtang aron mas makasaksi ang mga musalmot sa Indak-Indak sa Kadalanan karong Agosto 19, mag pasundayag na sa upat ka dapit sa Kadayawan Dome sa San Pedro Square ang mga partisipante inay sa naandan nga sa atubangan lang sa mga judges.


Gibalik sab ang Tunog Kadayawan o songwriting competition.

Giklaro ni Gatchalian nga libre ang entrance sa tanang events sa Kadayawan apan first come first served basis aron nga dili magkagubot hilabi na sa mga dagkong events.

Sa pikas bahin, gitin-aw sa Kadayawan Festival director nga wala’y angay ikabalaka ang katawhan hilabi na ang mga nagpuyo gawas sa syudad sa Dabaw nga duna’y plano nga musalmot sa mga nagkadaiyang events sa 32nd Kadayawan sa Dabaw Festival bisan pa man extended ang Martial Law sa Mindanao.



Sumala ni Gatchalian nga karon nga duna’y Martial Law, mas luwas hinuon sa kagubot ang katawhan tungod hugot ang seguridad nga gipatuman sa mga security forces sa dakbayan.

Matud ni Gatchalian, dili gubot ang Davao City ingon man wala’y angay nga kagul-an tungod mas daghan ang gipangmuntar nga checkpoint sa pasulod ug pagawas sa syudad, dugangan pa ang mga nagkadaiyang security measures sulod mismo sa event areas sa Kadayawan.


Kasamang Merle Comidoy

Facebook Comments