General Santos City— Dakong tabang alang sa kapulisan sa dakbayan ang mga donasyon gikan sa mga pribadong kumpnaya ug foundation. Kini ang gibutyag ni Gensan City Mayor Ronnel Rivera.
Sumala niya nga pinaagi sa mga donasyon, mapun-an ang kakulangon sa mga himan sa lokal nga pulisya sama nalang sa mga patrol vehicle ug uban pa. Gawas sa kulang nga ihap sa mga patrol vehicle, anaa usab ang problema sa maintenance sa mga sakyanan nga ginagamit karon hilabina sa mga police station.
Dugang pamahayag ni Mayor Rivera nga gawas sa mahindra patrol vehicle nga gihatag sa usa ka foundation, adunay plano ang lokal nga panggamhanan nga muhatag ug walo ka mga sakyanan.
Kini alang sa walo ka mga presinto sa kapulisan sa dakbayan kung asa gilauman nga mapalit na sa bulan sa oktobre higayon nga matapos na ang ginahimong bidding.
Samtang lakip sa mga ginapadalian mao ang pagpalit ug mga CCTV camera nga ipangbutang sa mga nag-unang kadalanan sa dakbayan batok kriminalidad ug adunay magamit ang kapulisan sa pagsulbad sa mga kaso kung walay mutumaw nga testigo.
