Indi pa dapat maglaylo sa kampanya kontra dengue, ini ang pagpanghangkat sang pamunuan sang Provincial Health Office sang South Cotabato sa atubang sang mga barangay opisyal kag local disaster risk reduction management sa probinsya kadungan sang ginpatigayon nga dengue forum sang tinalikdan nga adlaw.
Ginpahayag ni Dr. Rogelio Aturdido Jr., Provincial Health Office sang South Cotabato nga kon ano ang mga ginhimo nga aktibidad sa barangay para mapanubo ang kaso sang balatian nga dengue ang ipadayon suno pa kag nakahanda ang provincial government nga mag-augment sa kinahanglanon pa sang mga barangay.
Ini matapos nga base sa datos yara pa sa alert threshold level ang kaso sang balatian nga dengue sa probinsya bisan yara na sa 73 porsyento ang ginubo sang kaso.
Sa subong nagalab-ot na sa 5,692 ang kaso sang balatian nga dengue nga mataas sang 173 percent kumparar sang nagligad nga tuig kapareho nga period kag 24 na ang narekord nga patay sa balatian nga dengue sa probinsya halin Enero tubtob Setyembre 21 subong nga tuig.
Ang dengue forum ang gintambongan sang yara sa 131 ka mga barangay opisyal kag disaster risk reduction and management officer sa diin ginplastar ang dengue status sang probinsya kag subong man ang mga ginhimo nga aktibidad sang provincial government.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
