Mga barko pasingod sa Cebu ug Leyte waya na tuguti na mobiyahe matud sa Phil Coastguard Surigao del Norte Waya nay tagtugutan na makabiyahe na mga barko pasingod Leyte ug Cebu City resulta sa bagyong Urduja. Ini an kusganong tagpaklaro ni Master Sgt. Rommel Lomat, an Deputy Officer nan Phil. Coastguard Surigao del Norte. Sumaya pa niini, sugod kaganinang buntag hangtud kuman hapon, waya na nila tuguti an 3 ka Roro vessel na molawig pasingod sa Leyte. Lakip isab na an barko nan Cokaliong Shipping Lines pasingod sa Cebu City kuman gabii an tag-kanselar na nila an pagpabiyahe. Ini para na dili mabutang sa peligro an mga kinabuhi nan pasahero samtang nagbiyahe sa kadagatan. Dugang pa ni Lomat, gumikan sa kanselasyon sa biyahe moabot na sa 124 kabuok pasahero an stranded sa pagkakuman sa Lipata Port, ini kasagaran na mga pasahero pasingod sa Leyte. Pasiuna isab na taghatagan ini nan pagkaon pinaagi sa mga shipping companies ug sa tabang sa Phil. Ports Authority.
