i Balita
June 14, 2020
(Photo from web)
MGA BOARDERS SA SYUDAD NAGAPANAWAGAN SANG BULIG SA BOARDINGHOUSE COMMISSION
Tubtob subong wala sang nabaton nga sabat gikan kay Boarding House Commission Head Mr. Teddy Tingson ang mga boarders sa syudad sang Iloilo nga ginasukot sang ila landlords apisar nga wala sila nakaestar sa ila okupado nga hulot ukon unit bangud sang COVID-19 lockdown.
Suno sa reklamo sang mga boarders, ginasukot sila sang ila mga landlords sang bayad bisan pa n ga wala nila napuy-an ang ila hulot sa sulod sang tatlo ka bulan.
Ginahold pa sang ila landlords ang ila gamit samtang indi sila makabayad sang renta.
May iban nga mas ginpakamaayo nga maghalin na lang apang indi naman nila madala ang ila gamit bangud indi pag-irelease sang tag-iya sang boarding house.
Hingyo sang mga boarders kay Tingson aktuhan ang ila problema.
Nahibaluan nga madamo sang mga nagarenta sang balay ukon kwarto sa syudad ang nawad-an sang trabaho gani nagpauli sila sa ila lugar kag wala na naggamit sang ila hulot ukon unit sa sulod sang masobra sa tatlo ka bulan.
Si Tingson anay punong barangay sa Arevalo kag isa lang sa 29 ka Executive Assistants ni Mayor Jerry Trenas.
