Davao City – Gilauman sa Davao City Overland Transport Terminal (DCOTT) ang pagdagsa sa mga byaheros nga muuli sa ilang nagkadaiyang probinsya karong adlaw’ng Biyernes, Oktubre 26, subay sa umaabot nga Todos los Santos.
Sumala ni DCOTT Manager Aisa Usop, nakigpulong na ilang buhatan sa mga bus operation managers aron pahinumdoman kini nga kinahanglan aduna silay reserba nga mga bus aron ma-akomodar ang pagdagsa sa mga pasahero panahon sa Undas.
Gibutyag ni Usop nga wala pay impormasyon gikan sa mga bus operators kung adunay dili mubyahe karong umaabot nga mga holidays apan gipaneguro niini nga mapahibalo kini panahon nga muabot na ang maong impormasyon.
Sa pikas bahin, gitataw usab sa DCOTT manager nga wala pa silay nadawat nga koordinasyon gikan sa Land Transportation Office 11 (LTO-XI) ug Land Transportation and Franchising Regulatory Board 11 (LTFRB-XI) bahin sa pag lusad sa ‘Oplan Ligtas Biyahe’ kinsa tumong nga mapanegurong anaa sa kondisyon ang mga drivers ingon man mapaniguro ang kaluwasan sa mga byaheros panahon sa ilang paglawig.
RadyoMaN Jason Amisola
